Fréttir

Sauðárkrókshöfn. Fyrstu sex mánuði þessa árs eru komin á land á Sauðárkróki 6.544,5 tonn af ferskum og frosnum sjávarafurðum. Þar af eru komin á land 2.538,9 tonn af frosnum afurðum og 118,4 tonn af handfærabátum sem er nánast allt vegna strandveiði. Þá er búið að skipa upp 680 tonnum af frosinni rækju úr Barentshafi.

Í gær var lokið uppsetningu á nýjum flotbryggjum fyrir minni báta. Eru þetta tvær bryggjur, önnur 80 metra löng með 7 fingrum fyrir 14 báta og hinsvegar 60 metra löng bryggja fyrir 34 báta.

Sjálfsagt hafa margir verið að velta því fyrir sér hvað fiskiskipið Keilir sé að gera hér inni í höfninni upp í harða landi, með heljar mikinn búnað hangandi út yfir lunninguna. En verið er að skrúfa niður botnfestur fyrir væntanlegar flotbryggjur. Gengur það þokkalega, þó eru erfiðleikar við að skrúfa festurnar niður því mikill og þéttur jökulleir eða móberg gerir erfitt fyrir. En allt mun þetta hafast og einnig er ráðgert að byrja samsetningu á flotbryggjum um mánaðarmótin maí júní.